E dielë, 6 nëntor 2011, NOA - Sekretari i Përgjithshëm i OKB-së, Ban Ki-Moon ka dorëzuar raportin tremujor për situtaën në Kosovë.
Një pjesë të konsiderueshme të raportit Shefi i OKB-së ia ka kushtuar edhe dialogut mes Kosovës dhe Serbisë. Raporti përmban edhe një pjesë në të cilin pasqyrohet aktiviteti i EULEX-it gjatë muajve të fundit.
“Zhvillimet në Kosovën veriore shërbejnë si përkujtues i fuqishëm se çështjet e pazgjidhura përbejnë kërcënim për paqen dhe stabilitetin e rajonit”, shkruan Ban Ki Moon.
Raporti i Sekretarit të Përgjithshëm do të debatohet në seancën për Kosovën të Këshillit të Sigurimit që është caktuar të mbahet më 29 nëntor. Këtë muaj Këshillin e Sigurimit të OKB-së e kryeson Portugalia.
“Unë jam i shqetësuar jo vetëm për përkeqësimin e gjendjes së sigurisë në terren si rezultat i zhvillimeve të fundit, por gjithashtu edhe për përkeqësimin e marrëdhënieve ndëretnike anembanë Kosovës, polarizimin e qëndrimeve politike si dhe zgjerimin e hendekut mes komuniteteve në veri dhe në jug të lumit Ibër”, ka shtuar ai.
a.q/NOA
